Norðmenn hafna óskum um flutning á síldarkvóta

Norska sjávarútvegsráðuneytið hefur hafnað ósk íslenskra stjórnvalda um að íslenskar útgerðir fái heimild til að færa hluta síldarkvóta síns í norskri lögsögu á milli ára.

Þetta kemur fram á vefsíðu Fiskaren en þar segir að í svari norska sjávarútvegsráðuneytisins komi fram að ósk Íslendinga gefi tilefni til nýrra samninga og er íslenska sjávarútvegsráðuneytinu bent á að taka málið upp á vettvangi Norðaustur-Atlantshafsfiskveiðinefndarinnar í Lundúnum í næstu viku.

Stefán Ásmundson skrifstofustjóri sjávarútvegsráðuneytisins segir að Íslendingar telji eðlilegt að menn geti flutt ónýttar heimildir á milli ára sem og að ef veitt sé umfram heimildir séu þær skornar niður á móti á næsta fiskveiðiári. Hann vill ekki meina að neina deila sé komin upp við Norðmenn og að málið verði rætt í Lundúnum í næstu viku.

Fjallað er um málið á vefsíðunni Interseafood og þar kemur fram að samkvæmt aflastöðulista Fiskistofu máttu íslensk skip veiða 34.560 tonn af síld í norsku lögsögunni í ár. Aflinn stendur nú í rúmum 13 þúsund tonnum þannig að óveidd eru um 21.500 tonn.