Banna súludans en leyfa stauradans

Á síðasta fundi landbúnaðarnefndar Borgarbyggðar var samþykkt að nektar-eða súludans yrði alfarið bannaður í sveitarfélaginu. Hinsvegar hefði nefndin ekkert á móti því að leyfa stauradans. Í framhaldi af þessu bárust fregnir af því að stjórn sveitarfélagsins ætli að beita sér af alefli fyrir uppsetningu á ljósastaur í sveitarfélaginu.

Kristján Ágúst Magnússon formaður landbúnaðarnefndarinnar segir að fyrir fundinum hafi legið að gera athugasemdir við lögreglusamþykkt sveitarfélagsins enda bændur bundnir samþykktinni hvað varðar lausagöngu á fé, skotveiði og fleira. "Við samþykktum svo að taka undir álit félagsmálanefndar um að nektardans yrði alfarið bannaður í sveitarfélaginu," segir Kristján í samtali við Vísi.

Að sögn Kristján spunnust mjög fjörugar umræður um málið á fundinum. Einn fundarmanna, á sjötugsaldri, spurði hvort þetta þýddi að hann gæti ekki boðið ungri dömu heim til sín í "dans". Honum var sagt að láta kjurt liggja því sennilega myndi slíkt enda með hjartaáfalli hjá honum.

Einnig var spurt um hvort nektardansbannið næði einnig til gagnamannakofa. Kristján Ágúst segir í því sambandi að hann viti ekki til að nokkurntíma hafi komið upp vandræði vegna nektardans í þeim kofum.

"Við ákváðum svo að þótt súludans væri nú bannaður í sveitarfélaginu væri stauradans leyfður áfram," segir Kristján Ágúst. "Og svo fréttum við af því að sveitarfélagið væri að reyna að koma upp ljósastaur innan sveitarmarkanna."