Nýi borgarstjórinn er hraðlæs og kann ensku

Dagur B. Eggertsson, sem tók við embætti borgarstjóra í gær, lærði hraðlestur í menntaskóla og telur sig enn búa að þeirri reynslu. Hann segist því hafa ágætis færi á að kynna sér þau gögn sem honum beri sem borgarstjóri. Vilhjálmur Þ. Vilhjálmsson, fyrrverandi borgarstjóri, sagði í samtali við Stöð 2 í gær að mikið hafi mætt á honum í starfi sínu og því hafi hann hafi hreinlega ekki haft tíma til að lesa hvert einasta skjal.

Dagur segist einnig þokkalegur í ensku og sú kunnátta hans muni væntanlega nýtast honum þegar hann tekst á við vinnu við viðkvæm málefni borgarinnar. Mikið hefur verið gagnrýnt að samningur Orkuveitunnar sem fól í sér 20 ára framsal á verkefnum til REI hafi verið á ensku en ekki hinu ylhýra móðurmáli okkar Íslendinga.