Metupphæð greidd fyrir verk Ólafs Elíassonar

Listaverkið Fivefold eye eftir Ólaf Elíasson seldist fyrir litlar 80 milljónir króna á uppboði hjá Christie´s í Lundúnum á sunnudaginn var. Það er að líkindum mesta upphæð sem greidd hefur verið fyrir verk eftir Íslending að sögn Jóhanns Ágúts Hansens, listmunasala hjá Gallerí Fold. Inni í þessari upphæð eru ekki uppboðslaun Christie´s en þau nema að sögn Jóhanns 10-15 prósentum af kaupverðinu. Endanlegt verð verksins nemur því væntanlega um 90 milljónum íslenskra króna

Verkið var metið á bilinu 11 til 15 milljónir króna og seldist því á margföldu matsverði. Jóhann bendir á að salan slái léttilega út söluna á Hvítasunnudegi efti Jóhannes Kjarval sem seldist á 20 milljónir í Kaupmannahöfn í vor en það var hæsta upphæð sem greidd hafði verið fyrir verk Íslendings á þeim tíma.

Þá bendir Jóhann einnig á til samanburðar að Gallerí Fold hafi á sunnudag boðið upp verk eftir marga af virtustu listamönnum þjóðarinnar, eins og Jóhannes Kjarval og Þórarinn Þorláksson, og þar hafi um 150 verk selst fyrir um 40-50 milljónir króna samanlagt.

Fivefold eye er skúlptúr úr stáli og speglum. Það var sýnt í Basel Kunsthalle í nóvember 2000 og aftur í The Institute of Contemporary Art í Boston í janúar 2001. Jóhann segir að fjallað hafi verið um verkið í ýmsum bókum og var það meðal annars á forsíðu bókarinnar Olafur Eliasson eftir M. Grynsztejn, D. Birbaum, M. Speaks og fleiri sem kom út í London 2002.

Staðfestir stöðu Ólafs á alþjóðavettvangi

Aðspurður um þýðingu þessa segir Jóhann að salan staðfesti þá stöðu sem Ólafur Elíasson hafi á alþjóðlegum listaverkamarkaði. „Það má segja að þessi sala sé ákveðið stökk fyrir Ólaf en þetta er fyrsta verk hans sem selst á yfir milljón dollara," segir Jóhann. Hann segir að verk Ólafs hafi selst vel á þessu ári og fyrir töluverðar fjárhæðir en þó ekkert í líkingu við þetta. Þannig hafi verkið Colorvision verði selt á 10,1 milljón fyrr á árinu og ljósmyndaserían The Fault Series, sem er af misgengjum á Íslandi, seldist á 17,5 milljónir.

Jóhanni er ekki kunnugt um hver keypti verkið en segir að seljandinn, sem keypti verkið í Berlín árið 2000, uni væntanlega glaður við sitt. Aðspurður hvort líklegt sé að Íslendingur hafi keypt það segir Jóhann ómögulegt að segja til um það. Verk Ólafs hafi selst víðar en margra annarra íslenskra listamanna. Þeir hafi mest selt í Danmörku en verk Ólafs hafi meðal annars selst í Bretlandi, Bandaríkjunum, Hollandi og Grikklandi.