Innlent

Starfandi á vinnumarkaði fjölgar um átta þúsund milli ára

Starfandi fólki á vinnumarkaði fjölgaði um 7.600 á þriðja ársfjórðungi þessa árs miðað við sama tímabil í fyrra samkvæmt tölum Hagstofunnar. Á þriðja ársfjórðungi voru nærri 185 þúsund manns á vinnumarkaði sem jafngildir því að atvinnuþátttaka hér á landi sé 84 prósent. Þannig reyndist atvinnuþátttaka karla um 88 prósent og kvenna nærri 80 prósent. Þetta hlutfall er svipað og í fyrra.

Tölur Hagstofunnar sýna enn fremur að á þriðja ársfjórðungi voru að meðaltali 3.800 manns án vinnu og í atvinnuleit eða 2,1 prósent vinnuaflsins. Atvinnuleysi mældist 1,6 prósent hjá körlum og 2,7 prósent hjá konum. Þegar litið er til aldurs var atvinnuleysið mest meðal fólks á aldrinum 16-24 ára, eða 5,2 prósent. Atvinnuleysið er svipað og á sama ársfjórðungi í fyrra.

Af þeim sem voru atvinnulausir á þriðja ársfjórðungi þessa árs voru þúsund búnir að finna vinnu sem hefst síðar, eða nærri fjórðungur atvinnulausra. Þá voru 1.600 manns eða 42,5 prósent búin að leita skemur en einn mánuð að vinnu.

Meðalvinnuvikan var um klukkutíma styttri á þriðja ársfjórðungi þessa árs en á sama tíma í fyrra, eða 43 tímar á móti 44 í fyrra. Hjá körlum voru vinnustundirnar nærri 48 á viku en 37 hjá konum.

Mest lesið


Fleiri fréttir

Sjá meira


×

Mest lesið