Tilboð í landbúnaðartollkvóta töluvert lægri með nýjum reglum

Tilboð í tollkvóta vegna innflutnings á landbúnaðarvörum frá Evrópusambandslöndum voru allt að 66 prósentum lægri nú en í vor þegar slíkir kvótar voru síðast boðnir út. Þetta kemur fram í tilkynningu frá landbúnaðarráðuneytinu.

Þar segir einnig að í Einar K. Guðfinnsson landbúnaðarráðherra hafi í sumar breytt fyrirkomulagi útboðsins eftir að í ljós kom í vor að nokkur brögð voru að því að fyrirtæki byðu háar upphæðir í tollkvótann en innleystu svo ekki kvótann. Þannig bauð eitt fyrirtæki 207 milljónir króna í kvóta án þess að nýta hann en það leiddi til þess að neytendur fengu ekki að full notið aukins vöruúrvals eða betri viðskiptakjara.

Í lok síðustu viku fór fram endurúthlutun á ESB-tollkvótanum á grundvelli þessara nýju reglna. Alls bárust nítján tilboð ái tollkvótan en sjö fyrirtækjanna sem buðu uppfylltu ekki útboðsreglur varðandi ábyrgðaryfirlýsingu.

Þá segir landbúnaðarráðuneytið að í útboðinu hafi komið greinilega í ljós að fyrirtækin vönduðu sig betur og voru tilboðin einnig umtalsvert lægri en hafði verið í fyrri útboðum. Heildarfjárhæð útboðsins nam 144 milljónum króna.