Prestar og Samtökin 78 þinga

Prestar og Samtökin 78 munu efna til málþings í Þjóðminjasafninu á fösturdaginn kemur en þar á að ræða hjónabandið og staðfesta samvist. Fundarstjóri verður Ólafur Stephensen en málshefjendur verða fimm.

Dr. Sólveig Anna Bóasdóttir siðfræðingur fjallar um hjónabandið og mælir fram með þeirri skoðun að það skuli standa opið öllu fullveðja fólki í samfélagi okkar sem vill lifa saman í skuldbindandi ástartengslum. Hulda Guðmundsdóttir kirkjuþingsmaður og MA í guðfræði mun mæla fram með þeirri leið að hjónaband karls og konu og staðfest samvist fólks af sama kyni verði ekki sameinuð heldur skuli hvort um sig halda sérkennum sínum sem jafngild sambúðarform sem prestar fái umboð til að staðfesta að lögum.

Lára V. Júlíusdóttir lögfræðingur mun lýsa lagaumhverfi hjónabands og staðfestrar samvistar. Páll Óskar Hjálmtýsson og Monika Abendroth flytja sálma og ástarljóð. Feðgarnir Kristján Kolbeins og Eyjólfur Kristopher Kolbeins lýsa samskiptum sínum, en sonurinn er hommi.

Að lokum verða pallborðsumræður þar sem framsögumenn sitja fyrir svörum ásamt fulltrúum frá Samtökunum '78. Málþingið hefst kl. 13.30.