Vilhjálmur vill að borgarstjórn styðji málssókn Svandísar

Vilhjálmur Þ. Vilhjálmsson, fráfarandi borgarstjóri, lagði fram tillögu á fundi borgarstjórnar í dag um að borgarstjórnin styddi við málssókn Svandísar Svavarsdóttur vegna eigendafundar Orkuveitu Reykjavíkur. Þessa tillögu lagði hann fram fyrir hönd borgarstjórnarflokks Sjálfstæðisflokksins sem nú er í minnihluta.

Vilhjálmur óskaðui nýjum borgarstjóra, Degi B. Eggertssyni, til hamingju með nýja starfið. Hann sagði það erfitt en skemmtileg. Það tæki mikinn tíma og hann ráðlagði borgarstjóra að hitta fólkið í borginni og hlusta á það.

Þá vænti Vilhjálmur þess að nýr meirihluti og minnihluti gætu unnið saman að hagsmunamálum borgarinnar. Auðvitað yrðu menn ekki sammála um allt en hann lofaði því fyrir hönd borgarfulltrúa Sjálfstæðisflokksins að þeir myndi vinna faglega með nýjum meirihluta.

Vilhjálmur sagði mörg og stór verkefni bíða nýs meirihluta, ekki síst í málefnum aldraðra. Fyrir tilstuðlan fráfarandi meirihluta ætti á næstu misserum að byggja 210 öryggis- og þjónustuíbúðir fyrir aldraða. Það dygði þó ekki og finna þyrfti betri og fleiri búsetuúrræði fyrir eldri borgara.

Þá væri mikilvægt að fjölga félagslegum leiguíbúðum. „Við sem búum vel og höfum góð laun eigum að velta þessu fyrir okkur," sagði Vilhjálmur og sagði að það þyrfti að gera meira átak í þessum málum en sjálfstæðismenn og framsóknarmenn. „Það á ekki að sætta sig við að fólk búi á götunni," sagði Vilhjálmur.

Þá spurði Vilhjálmur nýjan meirihluta um málefnasamning og sagði að Reykvíkingar hlytu að eiga rétt á að vita hver stefna nýs meirihluta væri. Spurði hann hvort stefna í stórum málum væri ekki til. Benti hann enn fremur á að borgarstjórnarmeirihlutann greindi á um framtíð flugvallarins í Vatnsmýrinni.