Dagur: Verkefni borgarstjórnar að endurvekja traust

Dagur B. Eggertsson var kjörinn borgarstjóri á fundi borgarstjórnar sem hófst klukkan 14. Hann sagði verkefni borgarstjórnar sem heildar að endurvekja traust meðal borgarfulltrúa.

Dagur þakkaði nýjum meirihluta fyrir að treysta sér fyrir embættinu. Hann sagði tilfinningarnar tengdar því að taka við starfinu við þessar aðstæður nokkuð margslungnar. Það breytti ekki því að nýr meirihluti væri þakklátur fyrir tækifærið sem hann fengi.

Þá sagði Dagur að sér væri efst í huga það sameiginlega verkefni sem borgarfulltrúa biði, það væri að endurvekja traust meðal borgarbúa. Orkuveitumálið sýndi hversu mikilvægt það væri að stunda lýðræðisleg viðbrögð og hafa almannahagsmuni að leiðarljósi.

Dagur sagði að Orkuveitumálin hefðu verið sett í ákveðinn farveg en þar yrði þverpólitískur leiðangur. Mikilvægt væri að gera þetta því borgarstjórnar biðu fleiri verk en Orkuveitan, þar á meðal mannekla á leikskólum, málefni aldraðra og umhverfismál. Vonaðist Dagur eftir góðu samstarfi við minnihlutann þar sem flokkarnir væru sammála um mörg mál. „Við ætlum ekki að hlaupa í pólitískar kreddur," sagði Dagur.

Þá þakkaði Dagur Vilhjálmi Þ. Vilhjálmssyni, fráfarandi borgarstjóra, fyrir störf hans. Hann sagði að þótt umræðan hefði að undanförnu verið hörð og að sumu leyti sorgleg hefði Vilhjálmur að mörgu leyti verið góður borgarstjóri. Það mætti ekki gleymast að sameiginlegt markmið borgarfulltrúa væri að vinna að heilindum að því að gera Reykjavík að ákjósanlegum stað til að búa á. „Við þiggjum umboð frá borgarbúum og ég vil vera borgarstjóri allra borgarbúa," sagði Dagur.

Björn Ingi: Nafn Vilhjálms mun lifa lengi

Þá kvaddi Björn Ingi Hrafnsson, fulltrúi Framsóknarflokks, sér hljóðs og þakkaði sjálfstæðismönnum samstarfið. Þakkaði hann sérstaklega Vilhjálmi Þ. Vilhjálmssyni fyrir samstarfið og benti á að hans pólitíski ferill hefði spannað aldarfjórðung. Nafn hans myndi lifa langtum lengur en annarra í núverandi borgarstjórn.