Mokar „framsóknarflórinn" úr iðnaðarráðuneytinu

„Vatnalögin eru eitt af þeim stóru ágreiningsmálum sem komin eru upp á milli stjórnarflokkanna. Þeir vita ekkert hvernig þeir eiga að leysa úr málinu," sagði Valgerður Sverrisdóttir, fyrrverandi iðnaðarráðherra við upphafi þingfundar í dag. Framsóknarmenn segja að Össur Skarphéðinsson iðnaðarráðherra svíki stefnumál sem Samfylkingin hafi kynnt fyrir síðustu kosningar. Þá hafi flokkurinn lofað að fella svokölluð vatnalög úr gildi. Vatnalögin voru eitt allra umdeildasta málið á síðasta þingi.

Össur Skarphéðinsson sagði að ríkisstjórn Sjálfstæðisflokks og Samfylkingarinnar væri að efna loforð sem Valgerður hefði gefið sem iðnaðarráðherra. Hún hafi lofað að skipa nefnd, þvert á alla flokka, sem hefði það hlutverk að fjalla um vatnalögin. Hann sagði að Framsóknarflokkurinn hefði vonda samvisku í málinu og Valgerður ætti að þakka sér fyrir að moka flórinn út úr framsóknarfjósinu.

Vatnalögin, sem fela í sér að tilteknar vatnslendur verði skilgreindar í einkaeign, eiga að taka gildi 1. nóvember næstkomandi. Össur Skarphéiðinsson hefur lagt fram frumvarp þess efnis að gildistöku þeirra verði frestað um ár. Þverpólitísk þingnefnd verði svo falið það verkefni að gera tillögu sem allir flokkar geti sæst á.