Furðar sig á ályktun frjálslyndra kvenna

Margrét Sverrisdóttir borgarfulltrúi Frjálslyndra og óháðra furðar sig á því að ályktun Landssambands kvenna í Frjálslynda flokknum beinist einungis að sér en ekki Ólafi F. Magnússyni eða öðrum í hennar borgarstjórnarflokki sem yfirgáfu Frjálslynda flokkinn.

„Ég er enn að vinna að þeim stefnumálum sem ég kynnti fyrir síðustu kosningar og hef ekkert umpólast í pólitík," segir Margrét. Margrét segir að hennar ákvörðun um að yfirgefa Frjálslynda flokkinn sé engan vegin sambærileg við það sem gerðist þegar Gunnar Örlygsson yfirgaf Frjálslynda flokkinn og gekk til liðs við sjálfstæðismenn.

„Hann var kjörinn til að berjast gegn kvótakerfinu en gekk síðan í flokk sem varði það," segir Margrét. Hann hafi því umpólast í pólitískri stefnu. Hún segir mikilvægt að hafa í huga að hún hafi kært ákvörðun Gunnars til Umboðsmanns Alþingis í umboði Frjálslynda flokksins sem framkvæmdastjóri hans.

„Við þetta má svo bæta að framboðið til borgarstjórnar var framboð Frjálslyndra og óháðra og nú er ég óháð," segir Margrét.