Vatnssósa-Rósa Ómars er fyrsti íslenski bíldraugurinn

Daihatsu Ferrósa jeppi Ómars Ragnarssonar er nú kominn á fullt eftir að hafa sokkið í Hálslón, verið grýttur, laminn, brotinn og bramlaður. Bílinn var dæmdur algerlega ónýtur eftir atlögu óþekktra varga að honum við Hálslón en Ómar segir að svo virðist sem bíllinn sé nú genginn aftur.

Daihatsu Ferrósa bíll Ómars Ragnarssonar hefur níu líf. Líklega hafa fáir bílar á landinu þolað jafnslæma meðferð og þessi litli japanski slyddujeppi.

Ómar segir að óþekktir menn hafi oftar en einu sinni reynt að koma Rósunni sinni í bílakirkjugarð en án árangurs. Ætla má að óvinsældir bílsins eigi rætur í baráttu Ómars fyrir íslenskri náttúru en einhverjir sem eru ekki samstíga honum í þeirri baráttu vilja bílinn í parta.

Fyrsta atlagan að Rósu tókst ekki en sú næsta virtist hins vegar ætla að ráða henni bana. Þessi litli Jeppi var um tíma hálfgerður kafbíll en hann var um tíma á botni á Hálslóns, hann sökk í lónið fyrir slysni, "sama dag og þyrla Landhelgisgæslunnar nauðlenti utan við Straumsvík," segir Ómar.

Ómar dó ekki ráðalaus því hann saknaði bílsins. Kafarinn Árni Kópsson og hans menn voru kallaðir til og eftir nokkra leit fundu þeir bílinn á bólakafi í Hálslóni og drógu hann á þurrt í ævintýralegum leiðangri. Eftir þetta fékk bíllinn heitið Vatnssósa-Rósa.

En ekki fékk Rósa nýdregin nokkurn frið. Enn komu óþekktir skemmdavargar og brutu allt sem hægt var í Rósu o skyldu hana eftir í sárum í vatnsborðinu á Hálslóni.

Mennirnir létu það eftir sér að taka af henni hjólin og skildu Rósu eftir á náttúrulegum vörðum.

Ómar segir að eftir þessa atlögu hafi Vatnssósa Rósa hreinlega lifnað við eins og bíllinn Kristín í skáldsögu Stephen King. Ómar segir að Rósa hafi sést víða í framhaldinu, algerlega mannlaus og sjaldnast í sömu mynd. Stundum sem lík og stundum sem draugur á fullri ferð. Ómar segir að Vatnssósa-Rósa sé fyrsti íslenskri bíldraugurinn.