Stunginn í bakið með brotnum flöskustút

Aðfaranótt 14. október var lögreglu tilkynnt um líkamsárás við heimahús hér í bæ og fylgdi tilkynningunni að maður hafi verið stunginn í bakið með glerbroti. Á vettvangi var maður sem grunaður var um verknaðinn handtekinn en hann var jafnframt grunaður um að hafa brotið rúðu í útidyrahurð í sama húsi.

Samkvæmt upplýsingum frá lögregluni fékk sá er fyrir árásinni varð grunt sár á bak og þurfti að sauma fjögur spor til að loka sárinu. Við rannsókn málsins kom í ljós að árásarmaðurinn, sem er á 18. ári, hafði notað brotin flöskustút gegn þolanda árásarinnar. Málið telst að mestu upplýst.

Sömu nótt var tilkynnt um þjófnað á hljóðnema og fullri áfengisflösku frá skemmtistaðnum Höllinni og gátu starfsmenn Hallarinnar bent á mann sem talin er hafa verið þarna að verki. Lögreglumenn höfðu afskipti af manninum stuttu síðar og afhenti hann lögreglu hljóðnemann. Flaskan hafði hins vegar verið skilin eftir á veitingastaðnum og var þá búið að taka töluvert af innihaldi hennar.