Ríkisstjórnin standi við stóru orðin og efli verkmenntun

Fulltrúaráð VM, Félags vélstjóra og málmtæknimanna, skorar á ríkisstjórnina að ganga rösklega til verks í samræmi við stefnuyfirlýsingu sína um að efla fag- og verkmenntun á Íslandi.

Í ályktun frá fulltrúaráðinu er bent á stjórnvöld hafi nær eingöngu lagt áherslu á nám á háskólastigi en verk- og tæknimenntun hafi setið á hakanum. Þetta komi meðal annar fram í því að grunnskólana vanti tæki og tól til að kenna handverk og vekja áhuga á verkmenntun. Þá séu framhaldsskólarnir misvel tækjum búnir og geti af þeim sökum oft ekki kennt eftir námskrám.

Þetta hafi leitt til þess að æ færri ungmenni leggja stund á nám í málm- og véltæknigreinum. Það hafi svo haft þær afleiðingar að erlent starfsfólk sem hafi verið flutt inn í stórum stíl en það hafi ekki sömu þekkingu og íslenskir fagmenn hafi þróað. Það leiði aftur til lakara handverks en íslensk fyrirtæki og neytendur hafi átt að venjast.

Lýsir félagið yfir vilja til að vinna með stjórnvöldum að því að hefja nám á málm- og véltæknisviði til vegs og virðingar.