Rannsakar heitavatnsþjófnað í sumarbústöðum

Lögregla á Selfossi hefur til rannsóknar nokkrar kærur vegna meints þjófnaðar á heitu vatni. Fram kemur í frétt lögreglunnar að málin snúi að sumarbústöðum og felist í því að menn hafi náð að taka meira vatn inn í húsin en greitt er fyrir.

Í flestum tilvikum er það þannig að húseigandi kaupir ákveðinn skammt af heitu vatni sem þá fer í gegnum hemil sem er stilltur á það vatnsmagn sem samið er um kaup á. Hinir kærðu hafa síðan annaðhvort tengt fram hjá hemlinum eða rofið innsigli á honum og aukið við magnið.