Fimmtán ára á felgunni

Lögreglan á Selfossi stöðvaði fimmtán ára gamlan ökumann í gærkvöldi. Segja má að drengurinn hafi verið á felgunni í tvennum skilningi þess orðs, því hann var ölvaður undir stýri auk þess sem sprungið hafði á bílnum þannig að hann rásaði um allan veg.

Drengurinn var á Suðurlandsvegi á leið inn á Selfoss þegar lögregla fékk tilkynningu um óreglulegt aksturslagið og var hann stöðvaður við bæjarmörkin. Að sögn lögreglu hafði dregnurinn tekið bíllykla pabba síns ófrjálsri hendi og ekið af stað út í nóttina.

Kallað var á foreldra og barnaverndaryfirvöld og verður strákur væntanlega ákærður fyrir ölvunarakstur. Það verður því sennlega bið á því að hann fái bílprófið þegar hann verður sautján.