Ný félagshyggjustjórn að taka við í borginni

Dagur B. Eggertsson, verðandi borgarstjóri, segir að ný félagshyggjustjórn sé að taka við í borgarstjórn Reykjavíkur, sem muni leggja ríka áherslu á húsnæðis-. velferðar og leikskólamál. Það var fjölmennt á fundi Samfylkingarinnar við Hallveigarstíg í morgun. Þar fór Dagur yfir helstu málin sem nýr meirihluti ætlar að takast á við.

Dagur sagði Samfylkinguna vera flokk hinna daglegu verkefna og hins daglega lífs og hann sagði málið snúast um öruggan leigumarkað, umhverfið, göturnar, torgin og leikvellina. Viðfangsefni framtíðarinnar er að sögn Dags að snúa frá þeirri þróun borgarinnar að hún verði amerísk bílaborg, yfir í að verða borg sem einkennist af lífsgæðum.

„Það er kominn nýr meirihluti í Reykjavík, nýtt upphaf," sagði Dagur og bætti því við að aðstandendur hins nýja meirihluta hafi bundist trúnaðarsambandi um að koma aftur á stöðugleika og festu við stjórn borgarinnar.

„Við höfum bundist samtökum um að láta það upprót og átök sem öll þjóðin hefur orðið vitni að undanfarið, leiða til einhvers góðs."