Ótrúlegt að binda hendur OR á þennan hátt

Gísli Marteinn Baldursson, borgarfulltrúi Sjálfstæðisflokksins segir ótrúlegt að binda hendur Orkuveitunnar til 20 ára eins og samningur OR og REI gerir ráð fyrir. Gísli og félagar hans í borginni fengu ekkert að heyra af samningnum þrátt fyrir að tveir kynningarfundir hefðu verið haldnir um málið.

„Mér varð smám saman ljóst að þessi samningur væri til en heildarmyndin varð ekki ljós fyrr en fjölmiðlar fóru að fjalla um hann í gær og þá hlustaði ég með athygli." segir Gísli Marteinn Baldursson, borgarfulltrúi í samtali við Vísi. „Vilhjálmur Þ. Vilhjálmsson, fékk lykilstjórnendur í REI og Orkuveitunni til að kynna okkur í meirihlutanum málið á þriðjudag og miðvikudag í síðustu viku og þar var ekki minnst einu orði á samninginn," segir Gísli og leggur áherslu á að með lykilstjórnendum eigi hann við starfsmenn fyrirtækjanna en ekki stjórnarmenn.

„Mér finnst ótrúlegt að gera samning sem skuldbindur Orkuveituna til 20 ára, eða þar til ég verð orðinn 55 ára gamall."