Björn Ingi felldi tár á fundi Framsóknar í dag

Björn Ingi Hrafnsson, borgarfulltrúi Framsóknarflokksins, var hrærður og felldi tár á tilfinningaþrungnum fundi Framsóknarmanna í Reykjavík í dag. Hann bar lof á Vilhjálm Þ. Vilhjálmsson fráfarandi borgarstjóra. Björn Ingi sagðist finna til með vini sínum, borgarstjóranum fráfarandi. Björn Ingi fékk ótvíræðan stuðning Framsóknarmanna til að starfa í nýjum meirihluta í Reykjavík.

Það er óhætt að segja að ræða Björns Inga Hrafnssonar á fundi Framsóknarmanna í dag hafi verið áhrifarík en hann ræddi söguleg slit meirihlutans í Reykjavík þar sem Björn Ingi var sjálfur lykilmaðurinn.

Hann sagði að borgarfulltrúar Sjálfstæðismanna hefðu farið illa með oddvita sinn í borginni og að hann fyndi til með fráfarandi borgarstjóra.

Björn Ingi sagði að bakland borgarstjórans hefði brugðist á ögurstundu og því hefði ekki verið annað að gera en að slíta samstarfinu.