Sjálfstæðismenn lýsa yfir fullum stuðningi við Vilhjálm

Stjórn Varðar, fulltrúarráðs sjálfstæðisfélaganna í Reykjavík, lýsti yfir fullum stuðningi við Vilhjálm Þ. Vilhjálmsson sem oddvita flokksins í borginni á fundi ráðsins með borgarfulltrúum í dag. Júlíus Vífill Ingvarsson, borgarfulltrúi, segir að sjálfstæðismenn muni sýna hinum nýja meirihluta aðhald í borgarstjórn.

„Þetta voru ánægjulegir og gagnlegir fundir," sagði Júlíus Vífill Ingvarsson, borgarfulltrúi, í samtali við Vísi. „Fólk var sammála okkar aðferð í þessu máli og við vorum hvött til að sýna festu í minnihlutanum."

Borgarfulltrúar Sjálfstæðisflokksins komu saman til fundar í Valhöll í dag. Þar funduðu þeir fyrst með varaborgarfulltrúum þar sem farið var yfir atburðarás síðastliðna daga. Þá funduðu borgarfulltrúar með fulltrúaráði sjálfstæðisfélaganna í Reykjavík. Að loknum fundi lýstu fundargestir yfir fullum stuðningi við Vilhjálm Þ. Vilhjálmsson sem oddvita flokksins.

Júlíu segir það sárt fyrir sjálfstæðismenn að þurfa hverfa frá þeim verkefnum sem þeir voru með í vinnslu innan borgarinnar. Þá segist hann óska þess að Sjálfstæðisflokkurinn hefði tekið af skarið og samið við einhvern annan flokk á meðan tækifæri gafst. „Ég óska þess núna. Hins vegar störfum við ekki þannig. Við treystum því að Björn Ingi væri að starfa með okkur að heilindum."