REI fær öll erlend verkefni OR í 20 ár

Daginn áður en samþykkt var að sameina REI og Geysir Green Energy skrifaði forstjóri Orkuveitu Reykjavíkur, Hjörleifur Kvaran, undir samkomulag við Bjarna Ármannsson og Guðmund Þóroddsson, stjórnarformann og forstjóra REI, þess efnis að öll útrásarverkefni Orkuveitunnar næstu 20 árin renni til REI. Samningurinn er óuppsegjanlegur, jafnvel þótt að REI lendi að fullu í höndum erlendra eigenda.

Samningurinn er að sögn Hjörleifs Kvaran grundvöllur þess 10 milljarða mats sem lagt var á óefnislegar eignir Orkuveitunnar, svo sem reynslu, þekkingu og tengsl OR við sameiningu REI og GGE.

Athygli vekur að samningurinn skuli gerður til jafn langs tíma og raun ber vitni. Heimildir Vísis herma til að mynda að upphaflegar hugmyndir innan OR hafi hljóðað upp á að samningur við REI um þetta efni næði aðeins til 12 mánaða í senn, jafnvel þótt að REI hafi þá verið að fullu í eigu Orkuveitunnar.