Skipting embætta liggur fyrir

Boðað verður til blaðamannafundar klukkan 16:30 á Ráðhússtéttinni við Iðnó til þess að tilkynna um meirihlutasamstarf gömlu R-listaflokkanna, Framsóknarflokksins, Vinstri - grænna og Samfylkingarinnar ásamt Frjálsynda flokknum í borgarstjórn Reykjavíkur.

Þetta er gert í kjölfar þess að Björn Ingi Hrafnsson, borgarfulltrúi Framsóknarflokksins, sleit meirihlutasamstarfi við Sjálfstæðisflokkinn vegna ágreinings um málefni Reykjavik Engergy Invest.

Samkvæmt heimildum Vísis verður Dagur B. Eggertsson borgarstjóri, Svandís Svavarsdóttir, oddviti Vinstri - grænna, verður pólitískur staðgengill borgarstjóra og formaður sameinaðs borgarstjórnarflokks, Margrét Sverrisdóttir úr frjálslyndum og óháðum verður forseti borgarstjórnar og Björn Ingi Hrafnsson verður formaður borgarráðs eins og áður.

Þá hafa flokkarnir gert með sér samkomulag um að stofna hóp til að yfirfara mál Orkuveitu Reykjavíkur en rekja má deilur innan fráfarandi meirihluta sjálfstæðismanna og framsóknarmanna til ákvarðana tengdum fyrirtækinu og Reykjavik Energy Invest. Svandís Svavarsdóttir fer fyrir þessum hópi. Þá mun vera samkomulag um að Samfylkingin fari með stjórnarformennsku í Orkuveitu Reykjavíkur.

Hlutirnir hafa gerst hratt frá því að í ljós kom á aukafundi borgarstjórnar í gær að Björn Inga Hrafnsson og borgarfulltrúa sjálfstæðismanna greindi á um hverngi standa skyldi að sölu á rúmlega þriðjungshlut Orkuveitu Reykjavíkur í Reykjavik Energy Invest sem sameinaðist Geysi Green Energy í síðustu viku. Eftir því sem Vísir kemst næst hafa viðræður milli flokkanna sem standa að nýjum meirihluta staðið frá því í morgun.

Til stóð að meirihluti sjálfstæðismanna og framsóknarmanna hittist á fundi í Höfða klukkan eitt til að ræða meðal annars fjárhagsáætlun borgarinnar fyrir næsta ár og málefni REI. Björn Ingi mætti hins vegar ekki og laust fyrir klukkan tvö fór Vilhjálmur Þ. Vilhjálmsson borgarstjóri úr Höfða á fund Björns Inga. Þar greindi Björn Ingi Vilhjálmi frá því að hann hygðist slíta meirihlutasamstarfinu.