Erlendum nemendum á Akranesi fjölgar um 143%

Grunnskólanemendum af erlendum uppruna á Akranesi hefur fjölgað úr sjö í sautján frá því á síðasta skólaári. Það er aukning um 143%.

Þetta telst mikil aukning í ekki stærra sveitarfélagi og því ræða bæjaryfirvöld nú leiðir til að komast til móts við þennan nýja hóp nemenda og hvernig megi auðvelda honum að aðlaga sig að nýju samfélagi. Það sem af er á árinu hafa nemendur og kennarar á Akranesi sameinast um að létta hinum nýju nemendum lífið en tungumálaerfiðleikar hafa sett talsvert strik í reikninginn við kennslu.

Því hefur tillaga verið lögð fram um að ráða stuðningsfulltrúa eða tengilið sem hafi muni málefni hinna nýju nemenda á sinni könnu. Gert er ráð fyrir að slíkur tengiliður geti talað pólsku þar sem langstærstur hluti hinna nýju nemenda kemur frá Póllandi. Tengiliðurinn mundi einnig hafa umsjón með samskiptum við fjölskyldur hinna nýju nemenda.