Geir Haarde syngur I Walk The Line á nýrri plötu

Geir H. Haarde forsætisráðherra sýnir á sér nýja hlið nú í haust þar sem hann tekur lagið með hljómsveitinni South River Band á nýrri plötu sveitarinnar sem hlotið hefur nafnið Allar stúlkurnar. Lagið sem Geir valdi að syngja er hið þekkta I Walk The Line eftir Johnny Cash.

Kormákur Bragason gítarleikari South River Band segir að Geir hafi alveg ljómandi söngrödd og komi á óvart. Aðspurður um aðkomu forsætisráðherra að hinni nýju plötu segir Kormákur að náin fjölskyldutengsl séu á milli meðlima South River Band og fjölskyldu Geirs.

"Við strákarnir í hljómsveitinni erum allir ættlaðir frá Kleifum í Ólafsfirði eins og Inga Jóna Þórðardóttir eiginkona Geirs," segir Kormákur í samtali við Vísi. "Þar að auki er Matthías fiðluleikari okkar giftur bróðurdóttur forsætisráðherra."

Ekki náðist í Geir en Inga Jóna Þórðardóttir eigninkona hans segir að maðurinn sinn sé góður söngmaður. Geir syngur íslenska útgáfu af I Walk The Line í þýðingu Hjálmars Jónssonar dómkirkjuprests.