Varað við krapa á Hellisheiði

Vetur konungur hefur heldur betur bankað á dyrnar bæði á Suður- og Norðurlandi, þó einungis með ofankomu sunnan heiða. Lögreglan á Selfossi varar við krapa á Hellisheiði.

Það hefur eflaust ekki farið fram hjá vegfarendum í Reykjavík að Esjan er orðin grá og þá er Vífilfellið orðið hvítt niður í hlíðar. Þá er hvítt beggja vegna vegar á HellisheiðI en vegurinn sjálfur ekki hvítur. Hins vegar er krapi á veginum og hvetur lögreglan á Selfossi ökumenn á sumardekkjum til þess að fara varlega á Hellisheiðinni. Þá sé hætta á að hálka myndist á heiðinni þegar líður nær kvöldi og hitinn lækkar. Þá hafa ökumenn haft samband við fréttastofu og segja snjókomu í Þrengslunum.

Víða á Suðurlandi er hvítt yfir að líta og samkvæmt upplýsingum frá Veðurstofu Íslands var slydda á Höfn í Hornafirði, snjókoma á Fagurhólsmýri og slydda á Kirkjubæjarklaustri og í Vík í Mýrdal á hádegi. Þá er enn fremur hvasst við suðurtröndina en engar fregnir hafa borist af óhöppum.

Veðurstofan gerir ráð fyrir úrkomu á Suðurlandi í dag en hins vegar léttir til á morgun. Hitinn hækkar hins vegar ekki fyrr en eftir helgi.

Á Norðurlandi hefur ekki verið úrkoma en frost fór niður í sjö stig í Ásbyrgi í nótt sem telst nokkuð óvenjulegt á þessum árstíma þótt ekki liggi fyrir hvort um metkulda sé að ræða.