Falla frá hugmyndum um stækkun hafnar í Kársnesi

Útlit er fyrir að sættir séu í sjónmáli í deilu íbúa á Kársnesi í Kópavogi og bæjaryfirvalda eftir að Gunnar I. Birgisson tilkynnti á fundi í morgun að til stæði að falla frá stækkun hafnarinnar og hafnsækinni starfsemi á Nesinu. Formaður Samtakanna betri byggð fagnar breytingunum og segist tilbúinn til viðræðna um framhald mála.

Deilt hefur verið um það síðustu mánuði hversu langt eigi að ganga í skipulagsmálum á Kársnesinu. Bæjaryfirvöld vildu bæði stækka hafnarsvæðið og auka atvinnuhúsnæði á nesinu ásamt því að fjölga íbúum. Þessu mótmæltu margir Kársnesbúar og töldu of langt seilst þar sem slík uppbygging hefði för með sér aukna mengun og umferð sem götur Kársnessins réðu ekki við.

Skoða hugmyndir um léttari starfsemi

Sjálfstæðismenn í Kópavogi efndu til fundar í morgun þar sem Gunnar I. Birgisson bæjarstjóri fjallaði um skipulagsmál. Þar kom fram að meirihlutinn væri nú að skoða nýjar hugmyndir um Kársnesið, þar á meðal að falla frá stækkun hafnargarðsins og hætta sömuleiðis við hafnsækna starfsemi. Gunnar tók einnig nokkur dæmi af því hverju þyrfti að breyta í samgöngumálum á nesinu ef íbúum yrði fjölgað.

Gunnar sagði í samtali við við Vísi að í stað hafnarstarfseminnar sjái meirihlutinn fyrir sér léttari starfsemi, eins og læknastöð og skrifstofur fyrir arkitekta og ýmislegt þess háttar. „Það er allir sammála um að það þarf að taka til á Kársnesinu. Nýju hugmyndirnar gera ráð fyrir að Kársnesið verði betra en það er. Við vilja fjölga íbúum þar og styrkja innviðina," segir Gunnar og reiknar með að rætt verði við íbúa um framhaldið.

Nærri 1700 athugasemdir bárust frá einstaklingum og samtökum vegna skipulags á hafnarsvæðinu á dögunum og ljóst er af því að hugmyndirnar voru umdeildar. Gunnar segir að sér hafi fundist fullangt gengið gegn persónu hans í málinu. „Mér finnst mjög fínt að fólk láti í sér heyra, það er hluti af lýðræðinu. Við höfum hlustað á gagnrýni íbúa og finnum vonandi sameiginlega lausn á málinu.“

Komin samræðugrundvöllur milli aðila

Arna Harðardóttir, formaður samtakanna Betri byggðar, fagnar breytingum á afstöðu bæjaryfirvalda. „Það er alveg ljóst að nú er kominn samræðugrundvöllur á milli íbúa og bæjarins," segir Arna. Hún segist tilbúin til viðræðna við bæinn um framhaldið. „Við viljum öll sjá breytingar á Kársnesinu en það þarf að vera sátt um þær," segir Arna. Hún bendir á að íbúafjölgun á nesinu megi ekki verða meiri en umferðarmannvirki þoli og ef menn hyggist byggja upp íbúðir þá verði að skoða ráðstafanir sem þurfi að gera í umferðarmálum vegna þess.