Viðbrögð LÍÚ til skammar

Iðnaðarráðherra segir viðbrögð LÍÚ við mótvægisaðgerðum ríkisstjórnarinnar Landssambandinu til skammar. Stórútgerðarvaldið eigi ekkert inni hjá ríkisstjórninni.

Friðrik Arngrímsson framkvæmdastjóri LÍÚ gagnrýndi mótvægisaðgerðir ríkisstjórnarinnar í hádegisfréttum stöðvar tvö í dag og sagði Landsambandið frekar vilja sá niðurfellingu veiðigjalds og aðgerðir gegn mismunun á byggðakvótum, línuívilnunum og röngum slægingarstuðlum.

Össur Skarphéðinsson iðnaðarráðherra segir yfirlýsingar LÍÚ skammarlegar.

Framkvæmdastjóri Líú heldur því fram að mótvægisaðgerðirnar beinist lítið að útgerðinni og aukið fjármagn í hana hafi lítið að segja. Því er Össur ósammála og leggur áherslu á að sett verði aukið fjármgagn í hafrannsóknir og veiðigjaldið verði lækkað verulega á næstu tveimur árum. En það eru fleiri sem eru ósáttir við yfirlýsingar LÍÚ og það er Landsamband smábátaeigenda. Arthúr Bogason formaður sambandsins segir gagnrýni LÍÚ ósmekklega. Hann segir LÍÚ reyna að gera línuívilnanir, slægingarstuðla og byggðakvótann tortryggilega sem eigi ekki við rök að styðjast.