Fjúkandi reiður út í HB Granda

Gísli S. Einarsson bæjarstjóri á Akranesi er fjúkandi reiður út í HB Granda vegna ákvörðunnar fyrirtækisins um að hætta við að flytja upp á Akranes. "Það er verulega þungt í mér hljóðið sökum þess og þeir höfðu ekki einu sinni fyrir því að tilkynna okkur um þessa ákvörðun áður en hún birtist í fjölmiðlum," segir Gísli S. Einarsson bæjarstjóri á Akranesi í samtali við Vísi.

Gísi segir að ákvörðunin hafi komið eins...og köld vatnsgusa í andlitið á okkur" þar sem bæjarstjórn hafði þegar hafið undirbúning að komu HB Granda í bæinn. "Við höfum verið allir af vilja gerðir til að koma til móts við óskir fyrirtækisins og vildum aðstoða það eftir fremsta mætti," segir Gísli.

Aðspurður um hvort hann teldi að stjórn HB Granda hefði farið í fýlu vegna þess að óskum þeirra um íbúðabyggð á Norðurgranda var hafnað segir Gísli að það mætti álykta sem svo. "En það væri í hæsta máta óeðlilegt að láta slíkt bitna á bæjarfélagi okkar," segir hann.

Ennfremur kemur fram í máli Gísla að þessi ákvörðun reki fleyg í störf bæjarstjórnar. Búið hafði verið að undirbúa áætlun til að leggja fyrir fjárlaganefnd alþingis vegna áforma HB Granda á Akranesi m.a. með tilliti til aðkomu Siglingarmálastofnunnar að málinu.