Snarræði forðaði stórslysi í Kollafirði

Litlu mátti muna að fjöldi fólks slasaðist alvarlega í Kollafirði í morgun þegar rúta með fimmtíu farþega ók inn í aurskriðu við Esjurætur. Tveir farþegar meiddust lítillega.

Gríðarlegt úrhelli var suðvestan lands í gær og fossaði vatnið niður Esjuhlíðar þar sem lækirnir tóku ekki við. Vatnið safnaðist fyrir á gömlum þjóðvegi í hlíðinni og ræsi miðlaði síðan affallinu í halla ofan þjóðvegarins. Að lokum varð hallinn vatnssósa og lét undan með þeim afleiðingum að skriða fór yfir þjóðveginn og út í sjó.

Skriðan sem féll á þjóðveginn var allt að 40 metra breið og að minnsta kosti hálfur annar metri á dýpt.

Rútan ók beint á skriðuna og upp á hana og skemmdist talsvert en mildi er að hún varð ekki fyrir skriðunni sjálfri því hún féll örskömmu áður en rútuna bar að.

Bílstjóri rútunnar brást rétt við að sögn þeirra sem komu fyrstir að slysinu en hann náði að hemla áður en rútan hafnaði á skriðunni.

Farþegar í rútunni voru á leið frá Akranesi til Keflavíkur í flug og var það selflutt yfir í aðra rútu, sem send var úr Reykjavík. Fólkið slapp ótrúlega vel en tveir meiddust lítillega.

Ekki er vitað til að skriður hafi fallið áður á þessum slóðum og ekki er talin hætta á frekari skriðuföllum.