Tryggja verður að orkulindir verði í almannaeigu

Formaður iðnaðarnefndar Alþingis segir að tryggja verði að orkulindir þjóðarinnar verði í almannaeigu. Formaður Framsóknarflokksins telur hlutafélagavæðingu Orkuveitu Reykjavíkur orka tvímælis.

Viðræður um að bandaríski fjárfestingarbankinn Goldman Sachs ásamt Ólafi Jóhann Ólafssyni rithöfundi kaupi 8,5 prósenta hlut í Geysi Green Energy eru á lokastigi. Þar með verður bandaríski bankinn orðinn óbeinn eignaraðili að Hitaveitu Suðurnesja, sem á og rekur bæði virkjanir og dreifiveitur.

Katrín Júlíusdóttir, formaður iðnaðarnefndar Alþingis, sagði í hádegisviðtalinu í gær að það væri hennar skoðun og iðnaðarráðherra hefði einnig lýst því yfir að auðlindirnar ættu að vera í almannaeigu. Hlutverk stjórnvalda væri fyrst og fremst að tryggja fólkinu í landinu ódýrt rafmagn og vatn. Það yrði ekki gert með því að henda auðlindunum út á villtan markað.

Guðni Ágústsson, formaður Framsóknarflokksins, segir að það sé ekkert sjálfgefið að útlendingar komi bakdyramegin inn í íslenska orkuauðlindir. Íslendingar verði að ráða ferðinni og mikilvægt sé að fara yfir málið.

Þegar Guðni var spurður hvort hann teldi borgarfulltrúa Framsóknarflokksins í Reykjavík vera á villigötum með stuðningi við hlutafélagavæðingu Orkuveitu Reykjavíkur sagði hann: „Að háeffa er eitt og það hefur auðvitað verið gert með ein 5-6 orkufyrirtæki á síðustu árum og Orkuveita Reykjavíkur er að fara fram á það sama af hálfu þingsins. Síðan eru margvísleg önnur áform í þeirra huga og þessara stóru orkufyrirtækja sem við þurfum að fara yfir því að þetta er auðvitað almenningsfyrirtæki."