Vill endurskipuleggja sjúkraflutninga í landinu

Guðlaugur Þór Þórðarson heilbrigðisráðherra hefur skipað vinnuhóp sem á að gera á tillögur um endurskipulag sjúkraflutninga í landinu. Vinnuhópurinn fær aðeins um tvo mánuði til að vinna verkefnið og er gert að skila tillögum sínum til ráðherra eigi síðar en 15. nóvember eftir því sem fram kemur á vef ráðuneytisins.

Hópnum er sértaklega ætlað að meta þætti sem snúa að mönnun og rekstri sjúkraflutninga á landinu öllu. Gert er ráð fyrir að hópurinn setji einnig fram álitsgerð og tillögur um menntun og þjálfun sjúkraflutningamanna. Magnús Skúlason, framkvæmdastjóri Heilbrigðisstofnunar Suðurlands, verður formaður vinnuhópsins.