Yfir 15 þúsund fengu sér pylsu og kók

Ríflega 305 þúsund krónur söfnuðust um helgina þegar Bæjarins beztu buðu upp á pylsu og kók á 20 krónur til styrktar Konukoti. Þetta gerðu eigendur Bæjarins beztu í tilefni 70 ára afmælis fyrirtækisins.

Frá laugardagsmorgni og fram á sunnudagskvöld bauðst gestum pylsa og kók á þessum kostakjörum og er óhætt að segja að landinn hafi tekið vel við sér því langar biðraðir mynduðust við sölustaði Bæjarins beztu í Tryggvagötu, Skeifunni og Smáralind. Í tilkynningu vegna málsins er talað um stærsta pyslupartí Íslandssögunnar og þegar því var lokið höfðu 15.277 manns fengið sér pylsu og kók á Bæjarins beztu.

Guðrún Kristmundsdóttir, eigandi Bæjarins beztu, ákvað að afrakstur helgarinnar skyldi renna til Konukots, næturathvarfs fyrir heimilislausar konur sem er samstarfsverkefni Reykjavíkurdeildar Rauða krossins og Reykjavíkurborgar. Kristín Helga Guðmundsdóttir, verkefnisstjóri í Konukoti veitti gjöfinni viðtöku á miðvikudag.

Eigendur og starfsfólk Bæjarins beztu og stjórn Reykjavíkurdeildar Rauða krossins vill koma á framfæri innilegu þakklæti til allra þeirra sem gæddu sér á pylsu og kók um helgina og létu þannig gott af sér leiða fyrir heimilislausar konur.