Hæstiréttur staðfesti gæsluvarðhaldsúrskurð

Hæstiréttur staðfesti í dag gæsluvarðhaldsúrskurð yfir karlmanni sem var í síðustu viku dæmdur í 18 mánaða fangelsi fyrir ýmis auðgunarbrot og er grunaður um önnur afbrot eftir að dómur var kveðinn. Maðurinn skal sæta varðhaldi þar til dómur fellur í Hæstarétti en þó eigi lengur en til föstudagsins 5. október 2007.

Héraðsdómur Reykjavíkur dæmdi manninn þann 6. september síðastliðinn í 18 mánaða fangelsi fyrir ýmis auðgunarbrot. Daginn eftir var hann handtekinn fyrir innbrot í arkitektastofu í Reykjavík en hann þekktist á myndum úr öryggismyndavél. Maðurinn stal þaðan tölvubúnaði, flatskjám, kreditkortum, tékkhefti. Hann stal síðan bíl og fór í nokkra hraðbanka í Hafnarfirði og tók peninga út á kortin sem hann tók úr innbrotinu.

Maðurinn sagðist hafa verið undir áhrifum fíkniefna þegar afbrotið var framið. Hann hafi ætlað að selja þýfið upp í skuldir. Þýfið var metið á rúmar 5 milljónir króna.