Búið að samþykkja tvöföldun Suðurlandsvegar

Kjartan Ólafsson, þingmaður Sjálfstæðisflokksins segir að búið sé að samþykkja að tvöfalda veginn frá Reykjavík að Selfoss. Það hafi verið gert í síðustu samgönguáætlun sem samþykkt var á liðnu þingi. Kjartan segir að Vegagerðin vinni nú að skipulagi þessa vegar ásamt viðkomandi sveitarfélögum. Þegar skipulagið verði samþykkt muni framkvæmdir hefjast.

Sýslumaðurinn á Selfossi sagði í kvöldfréttum Stöðvar 2 að vegurinn á milli Hveragerðis og Selfoss væri orðinn eins og Miklabrautin í Reykjavík. Brýnt væri að tvöfalda hann strax.

Tvö banaslys hafa orðið á veginum milli Hveragerðis og Selfoss á þessu ári. Karlmaður á sjötugsaldri beið bana í bílslysi á veginum milli Hveragerðis og Selfoss í gær. Þetta er annað banaslysið á þessu ári en í mars síðastliðnum lést kona í bílslysi á sömu slóðum.