Tæplega 1700 athugasemdir vegna Kársness

Kópavogsbæ barst athugasemdir frá 1674 einstaklingum og samtökum við hugmyndir að skipulagi á hafnarsvæði á Kársnesi. Þar af bárust 1117 athugasemdir af Kársnesinu sjálfu. Langflestar þeirra voru sendar inn eftir að bæjarráð Kópavogs ákvað að framlengja athugasemdafrestinn til 3. september.

Fjórar athugasemdir bárust eftir auglýstan frest en eru teknar til greina engu að síður. Sömuleiðis athugasemdir frá börnum og ungmennum undir 18 ára aldri. Í heildartölunni eru jafnframt þrjár athugasemdir sem eru nafnlausar eða með ólæsilegri undirskrift.

Þeir yngstu sem gerðu athugasemd við hafnarsvæðið voru 2ja ára og þeir elstu um nírætt. Fjöldi athugasemda er samhljóða enda stöðluð form tiltæk á Netinu. Í fjölda tilvika barst sama athugasemdin frá mörgum innan sömu fjölskyldu.

 

Athugasemdirnar flokkast sem hér segir:

Af Kársnesi sendu 1115 inn athugasemdir auk Íbúasamtaka vesturbæjar Kópavogs og samtakanna Betri byggðar á Kársnesi.

Athugasemdir bárust frá 283 annars staðar úr Kópavogi.

Auk þess bárust athugasemdir frá 271 utan Kópavogs.

Nafnlausar athugasemdir eða með ólæsilegri undirskrift voru 3.

Skipulagsstjóri Kópavogsbæjar hefur athugasemdirnar til frekari greiningar og hliðsjónar við skipulagsvinnu á Kársnesi.