Vegarkaflinn milli Hveragerðis og Selfoss eins og Miklabrautin

Vegurinn á milli Hveragerðis og Selfoss er orðinn eins og Miklabrautin í Reykjavík segir sýslumaðurinn á Selfossi og telur brýnt að hann verði tvöfaldaður strax. Tvö banaslys hafa orðið á veginum á þessu ári með stuttu millibili.

Karlmaður á sjötugsaldri beið bana í bílslysi á veginum milli Hveragerðis og Selfoss í gær. Þetta er annað banaslysið á þessu ári en í mars síðastliðnum lést kona í bílslysi á sömu slóðum. Í báðum tilfellum fóru bílarnir út af sínum vegarhelmingi og rákust á bíl úr gagnstæðri átt. Átta banaslys hafa orðið í umferðinni í ár. Fimm þeirra voru í umdæmi lögreglunnar á Selfossi.

Á árunum 1972 til 2007 hafa 56 banaslys orðið á Suðurlandsvegi. Þar af hafa 9 látist á vegarkaflanum milli Hveragerðis og Selfoss síðastliðin ár.

Ólafur Helgi Kjartansson sýslumaður á Selfossi segir umferð á vegarkaflanum milli Hveragerðis og Selfoss hafa margfaldast síðustu ár og nauðsynlegt sé að tvöfalda veginn. Hann segir vegriðin geta bjargað mannslífum.

Ragnheiður Hergeirsdóttir bæjarstjóri í Árborg segir íbúa þar vera á sömu skoðun. Þeir vilji tvöföldun Suðurlandsvegar strax.

Samgönguráðherra stefnir að því að tvöfalda Suðurlandsveginn og ákveðið hefur verið að verja 7,4 milljörðum í þá uppbyggingu á næstu þremur árum.