Björgvin segir ónafngreinda sjálfstæðismenn vera bleyður

Björgvin G. Sigurðsson viðskiptaráðherra finnst ekki mikill mannabragur á þeim ónafngreindu þingmönnum Sjálfstæðisflokksins sem gagnrýndu hann í Viðskiptablaðinu í gær fyrir ákafa í að koma evru- og Evrópumálum á dagskrá. „En broslegt er það nú í besta falli að kapparnir skuli ekki geta verið menn til að tala undir nafni," segir Björgvin í nýrri færslu á heimasíðu sinni.

„Síðustu vikur hefur umræðan um Evrópumálin verið með fjörugasta móti. Sem er afar jákvætt enda um eitt stærsta hagsmunamál okkar Íslendinga að ræða," segir Björgvin. „Því var nokkuð kúnstugt að rekast á það í ágætri grein í Viðskiptablaðinu í dag að þar fjargviðrast einhverjir "ónafngreindir" þingmenn Sjálfstæðisflokksins yfir því að ég tali nokkuð tæpitungulaust fyrir því að þessi mál verði tekin af fullri festu á dagskrá."

Ennfremur segir Björgvin að við blasi að ekki hugnast þetta öllum í nefndum flokki, enda ekki ætlun hans að fara með veggjum til þess eins að styggja nú ekki viðkvæma í einstökum málum. "En broslegt er það nú í besta falli að kapparnir skuli ekki geta verið menn til að tala undir nafni.

Það undrar mig mjög. Sérstaklega þar sem nokkuð glöggt má geta sér til um viðmælendur út frá orðfæri og aðkomu að málinu," segir Björgvin og endar færsluna á eftirfarandi setningu: "Já, lítið leggst fyrir kappana í þessu máli altént."