Þorkell Helgason hættir sem orkumálastjóri

Dr. Þorkell Helgason hættir sem orkumálastjóri um áramót. Þetta kemur fram í tilkynningu frá Orkustofnun. Þar segir að Þorkell hafi af persónulegum ástæðum óskað eftir þessu við iðnaðarráðherra og hann fallist á óskina.

Jafnframt hefur ráðherra veitt Þorkeli leyfi frá daglegum störfum embættisins frá og með 1. október til að sinna fræðastörfum og skrifum um orkumál. Dr. Ragnheiður Inga Þórarinsdóttir, aðstoðarorkumálastjóri og staðgengill orkumálastjóra, mun því gegna störfum embættisins á fjórða ársfjórðungi þessa árs.

Þorkell er 65 ára og hefur verið orkumálastjóri í 11 ár. Hann hyggst starfa áfram í hlutastarfi en á öðrum vettvangi sem honum hefur verið hugleikinn. Það eru kosningamál en Þorkell er höfundur kosningakerfisins sem notað er í alþingiskosningum.