Frú Vigdís Finnbogadóttir gisti alltaf á D´Angleterre

 

 

Hotel D´Angleterre sem nú er komið í eigu Íslendinga er eitt þekktasta hótel Norðurlandanna og iðjulega gististaður þeirra þjóðhöfðingja sem koma í heimsókn til Kaupmannahafnar. Þegar frú Vigdís Finnbogadóttir fyrrum forseti Íslands kom til borgarinnar hér á árum áður gisti hún ávallt á D' Angleterre. Auk þeirra hafa nær allir frægustu kvikmyndaleikarar og tónlistamenn heims gist hótelið ef þeir hafa verið í borginni.

 

Hotel D´Angleterre var byggt fyrir 250 árum. Allt frá því um þarsíðustu aldamót hefur það skipað ákveðinn sess meðal efnaðri Íslendinga í Kaupmannahöfn en þeir notuðu hótelið óspart upp úr 1900 sem samkomustað sinn.

 

Annar þekktur Íslendingur sem snemma tók ástfóstri við D´Angleterre var nóbelskáldið Halldór Laxness. Gisti hann þar iðulega ef hann átti leið um Kaupmannahöfn.

 

Hótelið komst verulega í fréttirnar í forsetatíð frú Vigdísar á níunda áratugnum þegar frægur "kryddsíldarfundur" hennar og Margrétar Danadrottningar var haldinn í ráðstefnusal hótelsins. Kryddsíldarnafnið á fundinum kom í kjölfar þess að blaðamaður Morgunblaðsins þýddi danska orðið krydsild á þennan hátt en meiningin var að þær Vigdís og Margrét myndu svara spurningum fréttamanna opinskátt og af hreinskilni.

 

Og hér í lokin er ein skemmtisaga af dvöl hljómsveitarinnar The Rolling Stones á D' Angleterre árið 1999 er þeir héldu rómaða tónleika sína það árið á Parken.

 

Daginn sem hljómsveitin kom á hótelið var verið að vinna á fullu við byggingu Metro-stöðvarinnar við Kongens Nytorv en hún liggur við hlið hótelsins. Aðstoðarhótelstjórinn kom að máli við verkstjórann yfir borgenginu á byggingarstaðnum og bað hann um að halda hávaðanum í aðalborvélinni í lágmarki til hádegis daginn eftir því Mick Jagger og félagar myndu sennilega sofa frammeftir þann daginn. Verkstjórinn kom þessum skilaboðum áleiðis til Skotans Eddie McAllister sem stjórnaði stærstu vélinni af gerðinni Casagrande 6. Eddie svaraði honum fáu en strax klukkan sjö morguninn eftir var Eddie búinn að auka loftþrýstiginn á vélinni og setja "hamarinn" á fullt þannig að nær ólíft var fyrir hávaða á vinnusvæðinu framundir hádegið. "Ég læt ekki neina helvítis drykkjusjúklinga og dópista segja mér fyrir verkum," sagði Eddie með sínum kjarngóða Edinborgarhreim og glotti við tönn.