Ekki brot á samningum

Boðaðar aðgerðir Flugfreyjufélags Íslands eru brot á kjarasamningum segir forstjóri Icelandair. Ekki rétt segir formaður félagsins en á fjölmennum félagsfundi flugfreyja í gær var ákveðið að vinna ekki yfirvinnu.

Fundurinn var haldinn vegna þess að Icelandair sagði mörgum flugfreyjum upp nýverið. Flugfreyjur eru fyrst og fremst öryggisverðir í flugvélum og mega ekki vera færri en fjórir öryggisverðir í vélum Icelandair, samkvæmt öryggisstöðlum Boeing verksmijanna. Flugfreyjuhópurinn er þétt skráður út mánuðinn þannig að engin má fofallast án þess að það hafi áhrif á flugáætlun félagsins. Því var ákveðið á fundinum að vinna ekki umfram það sem búið er að ákveða samkvæmt vinnuskrám. Jón karl Ólafsson, forstjóri Icelandair sagði í hádegisviðtali stöðvar tvö í dag það vera brot á friðarskyldu.

Sigrún Jónsdóttir formaður flugfreyjufélags Íslands sagði í samtali við fréttastofu í dag að ekki væri rétt hjá forstjóranum að samþykkt fundarins í gær feli í sér brot á friðarskyldu. Hún sagði félagsmenn hafa ákveðið að vinna ekki umfram vinnuskyldu einkum vegna þess að álag á freyjur væri mikið. Félagsmenn hefðu ákveðið að funda með stjórn Icelandair til að leysa nokkur mál en enginn væri með hnefann á lofti enda stéttin verði seint sökuð um ósveigjanleika. Sigrún gat ekki sagt til um hvenær fundur með stjórninni yrði en veikindi innan stjórnar flugfreyjufélagsins hafa sett strik í reikninginn.

Einhverjar tafir hafa orðið á flugi vegna aðgerða flugmanna og segir jón Karl aðgerðir þeirra og flugfreyja auðveldlega geta kostað Icelandair mikla peninga.