Íslendingar næst umburðalyndastir allra þjóða

Íslendingar eru næst umburðarlyndastir allra vestrænna þjóða. Svíar eru umburðarlyndastir samkvæmt nýrri rannsókn sem unnin er af tveimur virtum háskólum, öðrum breskum og hinum áströlskum.

Í könnun sem nýlega hefur verið kynnt leggja ástralskir og breskir vísindamenn áherslu á að ná fram afstöðu vestrænna þjóða til fyrirfram skilgreindra minnihlutahópa. Könnunin tengist vísindaritgerð sem unnin er af Vani K Borooah við háskólann í Ulster og

John Mangan við háskólann í Queensland.

Afstaðan er könnuð hjá 30 þúsund einstaklingum í rösklega tuttugu þjóðlöndum til fólks af öðrum kynþætti, til Gyðinga, til múslima, til innflytjenda og erlends verkafólks og til samkynhneigðra.

Spurt var hvort viðkomandi kærði sig um einstakling úr ofangreindum hópum sem nágranna.

Niðurstaðan er sú að Svíar hafa mest umburðarlyndi gagnvart þessum minnihlutahópum og Íslendingar koma þeim næstir. Þar á eftir koma Hollendingar og Kanadamenn.

Bandaríski nýsköpunarsérfræðingurinn Richard Florida fullyrðir að umburðarlyndi sé einn veigamesti þátturinn í sköpunargáfunni og þetta skýri því að hluta hversu framarlega Íslendingar eru í nýsköpun. Hinir þættirnir sem verulegu máli skipta í nýsköpun eru tækni og hæfileikar.

Svíar hafa mest umburðarlyndi gagnvart fólki af öðrum kynþætti og Ný-Sjálendingar koma þeim næstir. Þar á eftir eru Íslendingar en Ítalir reka lestina.

Svíar standa líka minnst allra þjóða gegn múslimum en meira en 11% Íslendinga kæra sig ekki um múslima sem nágranna. Það vekur athygli að Norðmenn hafa næst minnst umburðarlyndi vestrænna þjóða gagnvart múslimum en Grikkir reka lestina að þessu leyti.

Það er sjónarmunur á sjónarmiðum Íslendinga og Svía gagnavart erlendu vinnuafli og innflytjendum en Portúgalar hafa mest umburðarlyndi gagnvart slíku fólki í sínu landi. Norður-Írar kæra sig síst um innflytjendur ef marka má þessa könnun.

Þrátt fyrir að ofbeldi virðist hafa aukist gegn samkynhneigðum hér þá eru Íslendingar í þriðja sæti yfir þá sem hafa mest umburðarlyndi gagnvart slíku fólki. Hollendingar og Svíar eru okkur fremri að þessu leytinu en meira en þriðjungur Norður-Íra vill ekki hafa samkynhneigða einstaklinga sem nágranna.