Faxaflóahafnir selja hlut sinn í Hafnarhúsinu

Stjórn Faxaflóahafna samþykkti á fundi sínum í dag tillögu Björns Inga Hrafnsson, formanns stjórnarinnar, að fela hafnarstjóra að auglýsa eignarhluta hafnarinnar í Hafnarhúsinu við Tryggvagötu, skrifstofuhúsnæði í Laugarnesi og Slysavarnafélagshúsið að Grandagarði 14. til sölu. Óskað verður eftir tilboðum í húsið með áskilnaði um að taka hvaða tlboði sem er eða hafna öllum eins og venja er.

Stjórn Faxaflóahafna lét gera verðmat á Hafnarhúsinu og Slysavarnafélagshúsinu á dögunum og liggur það nokkurn veginn fyrir nú. Faxaflóahafnir eiga rúmlega helmingshlut í Hafnarhúsinu, þar á meðal allt skrifstofuhúsnæði sem hýsir meðal annars skrifstofur Faxaflóahafna, samgönguráðuneytið og félagsmálaráðuneytið auk velferðarsviðs borgarinnar. Reykjavíkurborg á afganginn af Hafnarhúsinu þar sem Listasafn Reykjavíkur er til húsa.

Skrifstofuhúsnæðið í Laugarnesi er við Héðinsgötu 10 sem er eina byggingin sem stendur eftir á lóð sem borgin keypti af Olís árið 1997, að sögn Jóns Þorvaldssonar, forstöðumanns þróunar- og gæðamála hjá Faxaflóahafna. Það húsnæði hefur tollstjórinn í Reykjavík leigt undanfarin ár.