Flytja inn falsstinningarlyf í stórum stíl

Íslenskir karlmenn virðast ekki vera neinir eftirbátar norskra kynbræðra sinna í að falla fyrir gylliboðum sem berast í tölvupósti og lofa stórstígum framförum í bólinu.

Norsk tollayfirvöld merkja gríðarlega aukningu í smygli á ólöglegum rislyfjum til landisins að því er norskir fjölmiðlar greina frá. Mikið af þeim lyfjum sem tollurinn finnur eru svokallaðar sjóræningjaútgáfur af vel þekktum lyfjum á borð við Viagra.

Nú er svo komið að kjallarar tollayfirvalda í Ósló eru yfirfullir af stinningarlyfjunum en heilbrigðisyfirvöld vara sterklega við kaupum af þessu tagi. Í besta falli hafi lyfin engin áhrif en í versta falli geta þau innihaldið hættuleg efni.

Við athugun fréttastofunnar kemur í ljós að ástandið er svipað hér á landi og er meirihluti stinningarlyfja fluttur hingað frá Pakistan eða Indlandi og er allur umbúnaður heldur ófaglegur. Þá fjölgar ört tilraunum til að flytja inn töfralyf sem eiga að stækka getnaðarlimi karla án þess að nokkur viti hvað í þeim er eða hvort þau geri nokkurt gagn.