Straumur ætlar að tvöfalda starfsemina á þremur árum

Straumur-Burðarás ætlar að tvöfalda starfsemi sína á næstu þremur árum með kaupum á fyrirtækjum og með því að styrkja núverandi starfsemi sína. Stjórnendur bankans segja það ekki sitt hlutverk að svara því hverjir séu eigendur fimm prósenta hlutar sem keyptur var fyrir fáeinum vikum.

Straumur-Burðarás stefnir að því að heildartekjur fjárfestingarbankans fari í 1.250 milljónir evra fyrir árið 2010. Jafnframt stefnir bankinn að því að auka hlut kvenna í störfum hjá bankanum og að þær verði 40 prósent starfsmanna við lok næsta árs.

Bankastjórinn William Fall segir að Straumur sé í mjög góðri stöðu en frá því að hann tók við stjórnartaumum hjá bankanum hefur gengi bréfa lækkað um nærri níu prósent. Til samanburðar hafa stóru viðskiptabankarnir þrír hækkað frá því í byrjun júní, mismikið þó. Fall tók við stjórnartaumunum í Straumi í upphafi júní.

Straumur-Burðarás var í fréttum fyrr í haust þegar bankinn seldi eigin bréf í bankanum til nýrra hluthafa þegar gengi var lágt að mati fjármála sérfræðinga.

William Fall segir að Íslendingar ættu að fagna því að nýir erlendir aðilar væru að koma að félaginu sem fjárfestar. Hann segir það ekki hlutverk bankans að tilkynna um hverjir hinir ný eigendur eru.

Í dag kynnti Fall þriggja ára áætlun sem gerir ráð fyrir að að Straumur verði leiðandi fjárfestingarbanki í Norður- og Mið-Evrópu árið 2010.

Hann segir að markmiðið sé að styrkja innviðina, opna eigi ný útibú auk þess sem styrkja eigi starfsemina þar sem hún er fyrir. Þá eigi að kaupa fyrirtæki til örva vöxtinn.

Fall segir stefnt að því að arðsemi eigin fjár verði að jafnaði yfir 20 prósentum og að þóknunartekjur verði til frambúðar 75 prósent af heildartekjum.