Undirbúa áfram aðgerðir gegn svikafyrirtækjum

Stjórn AFLs starfsgreinasambands hyggst áfram undirbúa aðgerðir gegn fyrirtækjum sem ekki hafa upplýst um kjör og skráð erlent verkafólk eins og reglur gera ráð fyrir. Sambandið býður fram krafta sína í átak félagsmálaráðherra gegn slíkum fyrirtækjum.

Stjórn AFLs fundaði í dag vegna þeirrar deilu sem upp er komin milli sambandsins og Vinnumálastofnunar vegna eftirlits með fyrirtækjum með erlenda starfsmenn. Félagsmálaráðherra greindi frá því á föstudag að til stæði að efna til eftirlitsátaks í málaflokknum og fagnar stjórn AFLs því og býður fram aðstoð sína.

Formaður og framkvæmdastjóri AFLs funda á morgun með Jóhönnu Sigurðardóttur félagsmálaráðherra vegna málsins og segir í tilkynningu AFLs að þar muni sambandið leggja fram tillögur um samráð og samvinnu Vinnumálastofnunar og félagsins á félagssvæði AFLs.

Stjórnin ákvað að halda áfram undirbúningi að aðgerðum gegn fyrirtækjum sem hafa erlent verkafólk í vinnu og ekki hafa fullnægt reglum um skráningu og/eða óljóst er um kjör og réttindi starfsfólks.

Þá lýsir stjórnin yfir fullum stuðningi við yfirlýsingar formanns félagsins og framkvæmdastjóra síðustu daga og jafnframt að verði ekki gripið tafarlaust til harðra aðgerða í vinnustaðaeftirliti af hálfu Vinnumálastofnunar muni félagið grípa til allra þeirra aðferða sem það telji skila árangri til að berjast gegn félagslegum undirboðum.