Vilja tafarlausar úrbætur á aðstöðu íþróttafréttamanna á Laugardalsvelli

Gríðarleg óánægja er meðal íþróttafréttamanna vegna þeirrar aðstöðu sem Knattspyrnusamband Íslands býður upp á á nýuppgerðum Laugardalsvelli. Hafa Samtök íþróttafréttamanna sent bréf til sambandsins og fara fram tafarlausar úrbætur og afsökunarbeiðni frá KSÍ.

Fram kemur í bréfi Samtaka íþróttafréttamanna til KSÍ að íþróttafréttmönnum sé nóg boðið eftir leik Íslendinga og Spánverja á laugardag. Þá hafi íslenskum íþróttafréttamönnum verið sýnd þvílík vanvirðing að elstu menn í þessu fagi muni ekki eftir öðru eins. Rignt hafi á tölvur og skrifblokkir og þá hafi ölvað fólk ráfað um vinnusvæði íþróttamanna að leik loknum og því hafi ekki verið vinnufriður. „Verst af öllu var að enginn hjá KSÍ sem rætt var við á leiknum í gær sýndi vilja til þess að bæta úr málinu eða vera okkur innan handar, sem endurspeglar virðingarleysið fyrir okkar starfi," segir í bréfi frá Þorsteini Gunnarssyni, formanni Samtaka íþróttafréttamanna til KSÍ.

Hann bendir á að fundað hafi verið með KSÍ um málið fyrir einu og hálfu ári og þá hafi þáverandi framkvæmdastjóri KSÍ sagt að íþróttafréttamenn þyrftu engar áhyggjur að hafa, boðið yrði upp á aðstöðu innandyra á landsleikjum í framtíðinni. Þessi loforð hafi verið svikin á Laugardalsvelli á laugardag.

Fara samtök íþróttafréttamanna því fram á afsökunarbeiðni frá KSÍ vegna þeirrar aðstöðu sem boðið er upp á og að KSÍ bæti snarlega úr vinnuaðstöðu fyrir íþróttafréttamenn á landsleikjum í framtíðinni. Þá vilja samtökin einnig fá svör vð nokkrum spurningum, þar á meðal hvers konar aðstöðu íþróttafréttamönnum verður boðið upp á þegar Ísland mætir Norður-Írlandi á Laugardalsvelli á miðvikudaginn. Óska samtökin eftir svari frá KSÍ fyrir klukkan tvö í dag.

Eftir því sem fréttastofa kemst næst er viðbragða að vænta frá KSÍ í dag.