Alcan keppir áfram um orku Þjórsár

Með þeirri ákvörðun sinni að fella niður forgang Alcan að orku Þjórsárvirkjana og hleypa öðrum að samningaborðinu hefur stjórn Landsvirkjunar nú efnt til kapphlaups um næsta stóra orkusamning. Norðurál er þegar komið í slaginn en forstjóri þess kynnti opinberlega í gær ósk um að fá raforkuna til álvers í Helguvík.

Forstjóri Landsvirkjunar tók hins vegar sérstaklega fram á föstudag að ákvörðun stjórnarinnar þýddi ekki að búið væri að loka á Alcan. Og víst er að Straumsvíkurmenn líta alls ekki svo á að þeir séu nú úr leik. Þvert á móti verður viðræðum haldið áfram milli Landsvirkjunar og Alcan, sem heldur áfram vinnu við undirbúning nýs álvers í Þorlákshöfn og á Keilisnesi, samkvæmt heimildum Stöðvar tvö. Alcan-menn telja að þetta séu þeir tveir kostir sem helst koma til greina fyrir Alcan eftir að Hafnfirðingar höfnuðu í íbúakosningu deiliskipulagi sem gerði ráð fyrir stækkun í Straumsvík.

Stjórn Landsvirkjunar hefur það hins vegar í hendi sér á næstu vikum að móta veigamikla þætti atvinnuuppbyggingar í landinu næsta áratuginn með vali á samstarfsaðila. Velji hún Norðurál þýðir það hraðari uppbyggingu álvers í Helguvík. Velji hún Alcan þýðir það álver Þorlákshöfn eða á Keilisnesi. Stjórnin gæti einnig valið að gefa einhverjum hinna tíu umsækjendanna tækifæri til að annarskonar uppbyggingar, svo sem á sviði netþjónabúa eða kísilmálmvinnslu. Loks er sá kostur að semja ekki við neinn og sleppa því að virkja Þjórsá.