Viðskiptanefnd Alþingis kannar afstöðu banka til krónunnar

Stærsta fyrirtæki Íslands, Kaupþing, er að yfirgefa krónuna og hyggst skrá bæði bókhald sitt og hlutafé í evrum. Sigurður Einarsson, stjórnarformaður Kaupþings, lýsti því afdráttarlaust yfir á föstudag að það væri heppilegast fyrir hag þjóðarinnar að taka upp annan gjaldmiðil og taldi ekkert því til fyrirstöðu að Íslendingar tækju upp evru án þess að ganga í Evrópusambandið. Ráðamenn fleiri stórfyrirtækja hafa lýst svipuðum viðhorfum.

Spurður hvort stjórnmálamenn og Alþingi ætli að sitja aðgerðarlaus hjá segir Ágúst Ólafur Ágústsson, formaður viðskiptanefndar Alþingis, að nefndin muni strax eftir helgi heimsækja helstu fjármálafyrirtæki landsins þar sem þessi mál verði rædd.

Hann bendir á að stjórnarsáttmálinn ríkisstjórnarinnar geri ráð fyrir að komið verði á fót samstarfsvettvangi stjórnmálaflokka á Alþingi þar sem lagt verði mat á hagsmuní Íslendinga og þær breytingar sem eru að verða.

Þegar Ágúst er spurður hvort líklegt sé að breyting verði á afstöðu stjórnvalda í ljósi andstöðu Sjálfstæðisflokksins bendir hann á að í stjórnarsáttmála ríkisstjórnarinnar sé ekki gert ráð fyrir að sótt verði um aðild að Evrópusambandinu.