Tuttugu árekstrar á höfuðborgarsvæðinu í gær

Tuttugu árekstrar voru tilkynntir til lögreglunnar á höfuðborgarsvæðinu í gær. Þrír þeirra urðu á milli hálfátta og níu í gærmorgun og sjö á milli hálffjögur og hálfsex síðdegis. Í tveimur tilfellum voru ökumenn fluttir á slysadeild en meiðsli þeirra voru ekki talin mjög alvarleg.

Fjögur önnur umferðaróhöpp voru tilkynnt til lögreglu en í tveimur þeirra hafði grjót fallið af vörubílum og skemmt aðvífandi bíla. Lögreglan á höfuðborgarsvæðinu segir að umferð á helstu stofnbrautum hafi gengið þokkalega á álagstímum þótt tafir hafi orðið.

Þrír réttindalausir ökumenn voru stöðvaðir í umferðinni í gær en einn þeirra er jafnframt grunaður um fíkniefnamisferli. Þá var einn ökumaður tekinn fyrir að aka undir áhrifum fíkniefna.