Köstuðu grjótum í bifreiðar

Lögreglan á höfuðborgarsvæðinu hafði laust fyrir klukkan átta í kvöld afskipti af tveimur drengjum sem voru að kasta grjótum í bifreiðar við Hátún í Reykjavík. Drengirnir, sem eru 16 og 18 ára gamlir, reyndust báðir vera ölvaðir.

Samkvæmt lögreglunni á höfuðborgarsvæðinu voru drengirnir handteknir og færðir á lögreglustöð þar sem þeir voru yfirheyrðir. Þeim var síðan sleppt að loknum yfirheyrslum. Þeir neituðu báðir sök.

Að sögn lögreglu var búið að brjóta framrúðu sendibifreiðar sem stóð við dekkjaverkstæði Sigurjóns við Hátún. Ekki liggur fyrir hvort grjótkastið hafi valdið frekari skemmdum á nálægum bifreiðum.